Inaciu Galán (Xixón, 1986) ye periodista, profesor, xestor cultural y activista en defensa de los drechos llingüísticos, al frente de la ONG Iniciativa pol Asturianu dende l’añu 2011, dende 2016 forma parte del equipu de CuatroGotes Producciones. Nel ámbitu lliterariu apaez n’antoloxíes y volúmenes colectivos y vien collaborando con revistes como Lliteratura, Reciella Malory, Lletres Lliterariu, La Ratonera… asina como con artículos d’investigación alredor de la lliteratura y la llingua asturianes en revistes y volúmenes colectivos. Amás, fíxose con premios nel campu de la narrativa curtia, el monólogu, la poesía, la investigación y el periodismu, incluyendo’l Premiu Urogallo de Bronce pol so llabor en favor del asturianu y el Premiu Enriqueta González-Rubín de periodismu. En 2006 fundó la revista lliteraria Formientu, que dirixó hasta 2017 y qu’asoleyó yá la obra de más d’un cientu d’autores mozos asturianos, convirtiéndose nestos doce años d’actividá na cantera de referencia de la lliteratura asturiana. Autor d’obres como’l Diccionariu asturianu-inglés/inglés-asturianu (Trabe, 2006), primeru billingüe d’esti idioma con otra llingua distinta al castellán, o’l llibru infantil Nel, el coríu que nun sabía nalar (Asturtoons, 2012) nel campu poéticu tien trés volúmenes asoleyaos Tierra podre (Camelot, 2016), Patria en pallabres menores (BaxaMar, 2018) y Nes ruines de la nueche y les hores (Trabe, 2018), obra cola que se fixo en 2016 col Premiu de poesía Fernán Coronas.
@inaciugalan
www.inaciugalan.com
«Otru día toi pingando
ensin atopar abellugu.
L’agua perriba, amiyando,
y nos pies, xelándolos
nun champán fríu
que nun tardará en
convertise en folla.»